दिनांक – १२/०१/२०२६,ठाणे प्रतिनिधी, गर्जा महाराष्ट्र न्यूज:- दिनांक 15 जानेवारी 2026 रोजी होणाऱ्या ठाणे महानगरपालिका सार्वत्रिक निवडणुकीसाठी मतदान केंद्रांवरील कामकाजाकरिता निवडणूक विभागाकडून बजावण्यात आलेले आदेश नाकारल्याप्रकरणी ठाण्यातील रेन्बो इंटरनॅशनल या शाळेच्या मुख्याध्यापकांवर मा. राज्य निवडणूक आयोगाच्या मार्गदर्शक सूचनांनुसार गुन्हा दाखल केला असल्याची माहिती आयुक्त तथा निवडणूक अधिकारी सौरभ राव यांनी दिली.
मतदान प्रक्रिया पार पाडण्यासाठी मतदान केंद्रावर विविध शासकीय-निमशासकीय आस्थापना तसेच खासगी शाळांमधील शिक्षक व कर्मचाऱ्यांची नियुक्ती करण्यात आली आहे. या पार्श्वभूमीवर निवडणूक विभागाचे कर्मचारी ठाण्यातील रेन्बो इंटरनॅशनल शाळेत नियुक्तीचे आदेश बजावण्यासाठी गेले असता शाळेच्या मुख्याध्यापिका विमलेश सिंधू यांनी आदेश स्वीकारण्यास स्पष्ट नकार दिला. त्यानंतर दुसऱ्यांदाही अधिकृतरीत्या आदेश बजावण्यात आले, मात्र तरीही शाळेकडून आदेशाची अंमलबजावणी करण्यात आली नाही. यावर ठाणे महापालिका प्रशासनाकडून नोटीस देण्यात आली, ती स्वीकारण्यास देखील शाळेने नकार दिला.
निवडणूक प्रक्रियेत सहकार्य करणे हे कायद्याने बंधनकारक असून मतदानाचे काम हे राष्ट्रीय कर्तव्य आहे. या कर्तव्याचे जाणीवपूर्वक उल्लंघन करून निवडणूक कामात अडथळा निर्माण केल्याप्रकरणी महापालिका निवडणूक विभागाने रेन्बो इंटरनॅशनल शाळेविरोधात फौजदारी गुन्हा दाखल केला आहे. संबंधित मुख्याध्यापिका व शाळेविरोधात भारतीय न्याय संहिता, 2023 चे कलम 223 व इतर अनुषंगिक कलमांन्वये पोलीस विभागाकडून कारवाई करण्यात येणार आहे.
निवडणूक कामात अडथळा आणणे,आदेशांचे उल्लंघन करणे व शासकीय कर्मचाऱ्यांना कर्तव्य बजावण्यापासून रोखणे हे गंभीर व दंडनीय अपराध असून,अशा प्रकारांबाबत पालिका प्रशासनाने कठोर भूमिका घेतली असल्याचे स्पष्ट करण्यात आले आहे.
दरम्यान, निवडणूक प्रक्रिया शांततापूर्ण व सुरळीत पार पडण्यासाठी सर्व शैक्षणिक संस्था, खासगी आस्थापना व नागरिकांनी प्रशासनाला सहकार्य करावे. तसेच 14 व 15 जानेवारी 2026 रोजी निवडणूक कामासाठी नियुक्त केलेले कर्मचारी गैरहजर राहिल्यास त्यांना कठोर कारवाईस सामोरे जावे लागेल,असा इशाराही आयुक्त तथा निवडणूक अधिकारी सौरभ राव यांनी दिला आहे.