दिनांक – १३/०४/२०२६ मुंबई ,गर्जा महाराष्ट्र न्यूज:- संपूर्ण भारताला आणि जगाला आपल्या सुमधुर आवाजाने मंत्रमुग्ध करणाऱ्या सुप्रसिद्ध गायिका आणि महाराष्ट्र भूषण पुरस्काराने सन्मानित आशा भोसले यांचे दुःखद निधन झाले आहे. या दुःखद घटनेमुळे भारतीय संगीतविश्वावर मोठी शोककळा पसरली असून एक न भरून येणारी पोकळी निर्माण झाली आहे. शनिवारी त्यांना अचानक हृदयविकाराचा तीव्र झटका आला. या अनपेक्षित प्रसंगामुळे त्यांना तातडीने मुंबई येथील सुप्रसिद्ध ब्रीच कँडी रुग्णालय येथे वैद्यकीय उपचारांसाठी दाखल करण्यात आले होते. रुग्णालयात उपचार सुरू असताना त्यांची प्रकृती अत्यंत चिंताजनक बनली होती. डॉक्टरांच्या शर्थीच्या प्रयत्नांनंतरही दुर्दैवाने उपचारांना यश आले नाही आणि 92 व्या वर्षी त्यांनी जगाचा कायमचा निरोप घेतला. त्यांच्यावर आज संध्याकाळी ४ वाजता ऐतिहासिक शिवाजी पार्क येथे पूर्ण शासकीय इतमामात अंत्यसंस्कार केले जातील.
८ सप्टेंबर १९३३ रोजी सांगली येथे जन्मलेल्या या दिग्गज गायिकेने संगीताचे प्राथमिक धडे आपले वडील आणि प्रसिद्ध शास्त्रीय गायक दीनानाथ मंगेशकर यांच्याकडून गिरवले. वडिलांच्या निधनानंतर अत्यंत लहान वयातच त्यांच्यावर जबाबदारी पडली आणि त्यांनी गायनाला सुरुवात केली. सुरुवातीच्या खडतर संघर्षानंतर त्यांनी आपल्या अफाट प्रतिभेच्या जोरावर चित्रपटसृष्टीत स्वतःची स्वतंत्र ओळख निर्माण केली. त्यांची सांगीतिक कारकीर्द १९४३ मध्ये चला चला नव बाळा या त्यांच्या पहिल्या मराठी गाण्याने सुरू झाली, तर हिंदीतील सुरुवातीच्या गाण्यांनी त्यांना मोठी प्रसिद्धी मिळवून दिली.
आशाताईंनी हिंदी, मराठी, बंगाली, गुजराती, तमिळ आणि तेलुगू यांसारख्या २० पेक्षा अधिक भाषांमध्ये तब्बल १२ हजारांहून अधिक गाणी रेकॉर्ड करण्याचा एक भव्य ऐतिहासिक विक्रम प्रस्थापित केला. त्यांनी गायलेली पिया तू अब तो आजा, दम मारो दम, चुरा लिया है तुमने आणि ये मेरा दिल ही गाणी आजही संगीतप्रेमींच्या ओठांवर आहेत. विशेष बाब म्हणजे, सुप्रसिद्ध संगीतकार आर.डी बर्मन यांच्यासोबतची त्यांची सांगीतिक जोडी भारतीय चित्रपटसंगीताच्या इतिहासातील सर्वात यशस्वी जोड्यांपैकी एक ठरली. या अतुलनीय योगदानासाठी भारत सरकारने त्यांना पद्म विभूषण या सर्वोच्च नागरी पुरस्काराने गौरविले होते.
त्यांचा आवाज म्हणजे केवळ एक गाणे नव्हते, तर ती प्रत्येक मानवी भावनेला जिवंत करणारी एक विलक्षण जादू होती. त्यांनी केवळ फिल्मी गाणीच गायली नाहीत, तर गझल, भजन, कव्वाली, पॉप, मराठी भावगीते, बंगाली आणि इतर प्रादेशिक गाणी अशा विविध प्रकारांत आपला अमिट ठसा उमटवला. त्यांच्या अलौकिक आवाजात रोमान्स, विरह, खट्याळपणा आणि गझलेची नजाकत एकाच वेळी अनुभवायला मिळत असे. हा अद्वितीय आवाज म्हणजे भारतीय संगीतविश्वाचा एक अमर ठेवा आहे.