दिनांक – १६/०१/२०२६,पुणेप्रतिनिधी, गर्जा महाराष्ट्र न्यूज:-पुण्यातील कोंढवा परिसरातून एक मन हेलावणारी घटना समोर आली आहे. नाईट शिफ्ट संपवून सकाळी घरी परतलेल्या मुलाला आपले आई-वडील घरात मृतावस्थेत आढळले. या घटनेने परिसरात एकच खळबळ उडाली असून, पोलीस अधिक तपास करत आहेत.
नेमकं काय घडलं? मिळालेल्या माहितीनुसार, ही घटना कोंढव्यातील श्रद्धानगर परिसरात घडली. प्रकाश मुंडे (वय ५२) आणि ज्ञानेश्वरी मुंडे (वय ४८) असे मृत पती-पत्नीचे नाव आहे. त्यांचा २३ वर्षीय मुलगा गणेश मुंडे हा एका खासगी कंपनीत कामाला आहे. नेहमीप्रमाणे गणेश शुक्रवारी रात्री कामावर गेला होता.
शुक्रवारी सकाळी आपली नाईट शिफ्ट संपवून गणेश घरी परतला. त्याने घराचा दरवाजा वाजवला, परंतु आतून कोणताही प्रतिसाद मिळाला नाही. खूप वेळ आवाज देऊनही आई-बाबा दरवाजा उघडत नसल्याने गणेशला शंका आली. त्याने घाबरून शेजाऱ्यांना बोलावले आणि त्यांच्या मदतीने दरवाजा उघडला.हृदयद्रावक दृश्य दरवाजा उघडताच गणेशला धक्का बसला. त्याचे आई-वडील घरात बेशुद्धावस्थेत पडले होते. शेजाऱ्यांच्या मदतीने त्यांना तात्काळ ससून रुग्णालयात दाखल करण्यात आले, मात्र डॉक्टरांनी तपासाअंती दोघांनाही मृत घोषित केले.
मृत्यूचे कारण काय? पोलिसांनी दिलेल्या प्राथमिक माहितीनुसार, मृत ज्ञानेश्वरी मुंडे यांना मागील वर्षभरापासून ब्रेन ट्युमरचा त्रास होता. त्या गंभीर आजाराने ग्रस्त होत्या. पती प्रकाश मुंडे हे चालक म्हणून काम करत होते. पत्नीच्या आजारपणामुळे आणि सततच्या उपचारांमुळे कुटुंब तणावात असावे, असा अंदाज वर्तवण्यात येत आहे. याच नैराश्येतून किंवा आजारपणाला कंटाळून या दाम्पत्याने टोकाचे पाऊल उचलले असावे, अशी शक्यता वर्तवली जात आहे.
कोंढवा पोलिसांनी या प्रकरणी अकस्मात मृत्यूची नोंद केली असून, शवविच्छेदन अहवालानंतरच मृत्यूचे नक्की कारण स्पष्ट होईल, असे पोलिसांनी सांगितले आहे. एकाच वेळी आई आणि वडिलांचे छत्र हरपल्याने गणेशवर दुःखाचा डोंगर कोसळला असून परिसरात हळहळ व्यक्त केली जात आहे.